Hervormde Kerk Rustenburg Geloofsbond

Die Bybel is die Woord van God

Ons glo vas dat die Bybel genoegsaam is vir ons saligheid. Soos in Artikel 2 van die Nederlandse Geloofsbelydenis verklaar word: God openbaar Homself deur die Skrif – en dit is genoeg. Die Bybel is nie bloot ‘n menslike dokument nie; dit is God-geïnspireerd en dra ‘n gesag wat alle menslike menings oortref.

By ons eredienste, kategese en Bybelstudie gebruik ons die Afrikaanse vertalings soos die 1933, 1953 en 1983 weergawes, asook die Bybel vir Almal. Ons is bewus daarvan dat enige vertaling ook interpretasie is, en daarom keer ons telkens terug na die oorspronklike tale: Hebreeus, Aramees en Grieks.

---

2. Ons Bely saam met die Kerk van Alle Eeue

Ons bely saam met die wêreldwye kerk die drie klassieke Ekumeniese Geloofsbelydenisse – Apostoliese, Nicea en Athanasius. In ’n tyd waar sekere geloofswaarhede herinterpreteer of bevraagteken word, hou ons vas aan:

• Die werklike maagdelike geboorte van Jesus
• Sy liggaamlike opstanding uit die dood
• Sy Hemelvaart, Wederkoms en die ewige lewe

Hierdie is nie bloot simbolies nie – dis werklikheid.

---

3. Die Belydenisskrifte: Ons Teologiese Grondslag

Ons staan op die drie Reformatoriese belydenisskrifte: die Nederlandse Geloofsbelydenis, die Heidelbergse Kategismus en die Dordtse Leerreëls. Hulle help ons om die Bybel reg te verstaan en reg toe te pas. Ons glo:

• Die mens is sondig en het verlossing nodig
• Christus se kruisdood is ons enigste soenoffer
• Geloofsgehoorsaamheid is ’n dankbare antwoord op genade
• Slegs geloof in Christus red – Solus Christus

Ons verstaan die sakramente (Doop en Nagmaal) soos dit in die belydenis en liturgiese formuliere uitgespel word – daarom lees ons die formuliere voor tydens die bediening daarvan.

---

4. Ons Spreek Moderne Dwalings Aan

In ons tyd word baie dinge as ‘waarheid’ verkondig wat lynreg teenoor die Skrif staan. Die steedsHervormers hou by:

1. Die mens is na God se beeld geskape, maar is nie goddelik nie.
2. Ware vergifnis kom van God af – dit is ’n vertikale daad, nie net menslike empatie nie.
3. Evangelieverkondiging is die kern van kerkwees – nie sosiale aktivisme nie.
4. Die huwelik is ’n lewensverbintenis tussen een man en een vrou, soos deur God ingestel.
5. Ons aanvaar die belydenisskrifte omdat dit met die Bybel ooreenstem (die quia-beginsel).
6. Die Bybel is genoeg – Sola Scriptura.
7. Waarheid saak maak. Om die waarheid te praat is ’n Bybelse opdrag.

---

5. Ons Gemeentes: Wie Ons Is en Hoe Ons Werk

Ons is selfstandige gemeentes wat sáámwerk in die Geloofsbond, sonder ‘n sentrale gesagstruktuur. Elke gemeente is kerk in eie reg, met sy eie aanvaarde Kerkorde. Ons werk op die beginsels van presbiteraal-sinodale kerkreg, en ons samewerking is ondersteunend – nie voorskriftelik nie.

Ons glo in die belang van volkskerk: die Evangelie moet elke mens in sy/haar eie taal en kultuur aanspreek.

---

6. Ons Liturgie: Eerbiedig en Eenvormig

Ons eredienste dra ’n gevoel van gewydheid en respek vir God. Daar is ’n basiese eenvormigheid in hoe ons aanbid, en ons gebruik ’n uitgebreide liedboek met inhoud wat in lyn is met die Woord en die Belydenis. Hoewel tradisie nie heilig is nie, is dit waardevol – dit dra ons en herinner ons aan waar ons vandaan kom.

---

Slotgedagte

As steedsHervormers is ons nie ’n breekgroep nie, maar ’n bly-groep. Ons wil getrou bly aan die Skrif, die belydenis, en die roeping wat God aan Sy kerk gegee het. Ons staan vas – nie uit hardkoppigheid nie, maar uit liefde vir die Waarheid.

“Hier staan ons. Ons kan nie anders nie.”